A çival montarent qi tot meio poon,
E seguent li cam à força et à bandon.
Tant alirent, q’i no demoron,
Qe à li bois li s’aprosmon
Unde gran fle de lo morto venon,
E voit le can qe sor lui s’areston.
Quant i le voit, arer se traon.
Porme li pré i guardent e veon,
Li palafroi d’Albaris coneon ;
Quant i le voit, grant dol en demenon.
Quant l’inperer oit pris à guarder,
Conoit li palafroi d’Albaris en primer,
Et in apreso conoit li levrer,
Çascun començe altament à crier :
« Questo e gran dalmaço, nobel enperer ! »
K. apela dux N. de Baiver :
« Conselés moi, je vos voio en proier. »
E dist N. : « Questo no se po çeler
« Qe la justisie si fait li levrer ;
« Colu q’el plu ait sa tot le mester :
« Ora faites Macario pier,
« Q’el vos savera tot li voir conter.
« E à Paris faron li corpo aporter
