« Donde Macario n’estoit calonçé,
« Si cum li can li oit au en aé.
« Se li can est vinto, el soia delivré.
« E se Machario e por lui afolé,
« De mantenent el soia çuçé
« Como traites e malvasio renoié. »
Quant qi qe erent à li conseil privé
Oldent N. coment ont parlé,
Çascun li oit molto ben agraé,
Ne le fo nul qe se traïst aré.
Meesmo li rois li oit otrié.
Li parenti de Machario en fon çoiant e lé ;
N’en cuitoit mie le fato fose si alé
Qe por un can fose vinto ni maté.
Çoiant fo li parenti Gainelon
Del çuçement c’oit dito Naimon ;
N’en cuitoit mie si alast la rason
Qe por un can fose vinto un tel baron.
E l’inperer qe K. oit non
N’en volse fare nula demorason.
Desor la place, davanti li dojon,
Una gran stele a fait lever en son,
Molto ben sera entorno et environ.
