Li rois d’Ongrie, li saiges et li ber,
Les mesagiers vait adès incliner.
Si com ses freres les fait il honorer.
A la roïne a fait robes tailler
Com il afiert, de paille et de cendel, (*)
Et ensement le fait à Varocher
Qu’en sa baillie ot la dame à garder.
Et fait li rois, quant vint au desevrer,
Tote sa nef garnir et estorer
De totes choses que li feront mestier :
De pain, de vin, et de chair à mangier.
Et en après quatre suens chevaliers
A fait li rois richement conréer,
Qui cele dame voisent à convoier.
En la nef entrent quant tens est de nagier.
Et Blancheflor, où il n’ot qu’ensegner, (*)
Au roi d’Ongrie vient congié demander,
Et à la roine, à la bele au vis cler.
Primerain l’oste ne vout mie oblier ;
Grant don li fist, si fist à sa moillier.
Une rien fist dont moult fist à loer,
