« Se nel consent, sel faites desfier,
« Que il de vos bien se doie garder.
« Et après faites vostre gent asembler
« Tant qu’en aiés bien cinquante milliers. »
Et dist li rois : « Bien fait à otrier ;
« Mais qui porrons à Kallon envoier ?
— Florimont, sire, cil li respont arrier,
« Ensemble o lui et Gerart et Renier,
« Et Godefroi, le hardi et le fier.
— Par foi, dist il, ja meillors ne requier.
« Or me les faites maintenant atorner,
« Que je n’ai cure orendroit dou targier. »
Si hautement les fist il atorner
Com à droit roi il apent et afiert ;
Et cil s’en vont tot le chemin plenier.
Tant sont alé, nen vuelent sojorner,
En France vienent, si se font osteler.
A Paris trovent Kallemaine au vis fier,
Ensemble o lui duc Naimon de Baivier
Et le Danois, Anséis et Garnier,
Et asés d’autres, qu’erent boin chevalier.
Descendu sont à un moult boin ostel,
Et quant un poi sont laiens sojorné,
Al palais montent, si vont au roi parler.
Page:Anonyme - Macaire, chanson de geste.djvu/369
Le texte de cette page a été corrigé et est conforme au fac-similé.
2089—2112
177
Macaire.
