Font à la terre chéoir et trebuchier.
Grans fu la joste d’ambedeus chevaliers
Si que nus hom ne la séust conter.
Ja fust uns d’eus mors sans nul recovrier
Quant li sorvient Kallemaines li ber
Et li dus Naimes del duché de Baivier.
D’autre part vienent maint autre chevalier
Floriadent et socorre et aidier.
Adonc les font ambedeus desevrer.
Grans fu l’estors et si durs et si fiers
Nel vos porroie ne dire ne conter.
Et Blancheflor, la roïne al vis cler,
Ert de son pere ens el demaine tref
Et plaint et plore et fait moult grant dongier,
Quant voit ocirre maint des suens chevaliers
Dont roïne ert et si se fait claimer.
Où voit son pere, le prent à apeler.
« Peres, fait ele, moult est grans li dongiers
« De ceste gent qu’à mort faites livrer,
« Si sont de moi tuit ami et privé.
— Fille, dist il, ne puet par el aler ;
« C’est por le roi honir et vergoigner
« A cui pieça vos donai à moillier.
« Ne vos doit mie de ceste oevre peser
« Quant il vos fist si vieument malmener,
« Et quant de France vos fist deseriter.
« Tel mesprison ne puis mais oblier.
Page:Anonyme - Macaire, chanson de geste.djvu/401
Le texte de cette page a été corrigé et est conforme au fac-similé.
2450—2476
209
Macaire.
