Page:Anonyme - Macaire, chanson de geste.djvu/414

222

2624—2640

Macaire.

Et in apreso, ançi q’el fust sevré,
Tot le cope c’avoit Salamoné,
E l’arçentere de gran nobelité,
Le armaure cun li branc amolé
Via la oit tota quanta porté.
No s’en perçoit homo de mere né.
De cella colse no s’avoit doté,
Nen cuitoit qe lairon fust la dens entré
Por la paure d’eser apiçé.
E Varocher, cun tota sa masné,
S’en retorno tuti çoiant e lé
A la soa oste, avanti li jor sclaré.
Quando celli le vent cosi ben atorné,
Qe de avoir erent tot carçé,
E li destrer mener si abrivé,
Dist l’un à l’altro : « O son costor alé
« Qe tant avoir avont guaagné ? »
Dist Varocher : « Or n’en vos mervelé,
« Qe de tel lois l’avemo aporté
« Là o de l’altro estoit à gran planté. »
Dist l’uno à l’altro : « E non sero daré. »
Plus de doa mile li sont avoé
Cun Varocher aler à la çelé ;
Mais Varocher no li oit pais refusé.
Davanti son sir elo est alé,
Le bon çival de K. l’inperé
Tot primament elo li oit doné,