A grant merveille sont preu li chevalier ;
Ne s’entreprisent la monte d’un denier.
Au branc d’acier chascuns l’autre requiert.
Se l’uns est preus, li autres est legiers.
Les arméures, fors les elmes d’acier,
Trosqu’en la chair n’ont failli à trenchier.
« Sainte Marie, dist li Danois Ogiers,
« A grant merveille est fiers icil maufés ;
« Ja ne vi mais home de tel fierté.
« A grant merveille est preus li chevaliers. »
Il l’en apele sel prent à aresner.
« Chevaliers sire, dist li danois Ogier,
« En cort le roi où vos estes sougiés
« Par vo droit nom com vos faites claimer ? »
Et cil li dist : « J’ai à nom Varocher.
« Poi de tens a que fui fais chevaliers ;
« Estre soloie premier uns pautoniers
« Et en forest sempres à converser.
« Por un service oi del roi tel loier
« Que il me fist fervestir et armer
« Et de novel m’adoba chevalier.
« De cele chose que me covient celer
