Page:Anonyme - Macaire, chanson de geste.djvu/463

3202—3228

271

Macaire.

« Dont ert la pais faite d’ambedeus lez. »
Dist Varochers : « Vos feriés grant bonté ;
« Or en tornés et plus ne demorés. »
Et li Danois a congié demandé,
De Varocher s’est parti et sevré.
A l’ost Kallon il s’en est repairiés.
Et quant li vont enquerre et demander
De la bataille coment il ot ovré,
Il lor respont vaincus est et matés.
Et quant il fu del cheval desmontés
Et de ses armes quant il s’est despoillié,
Devant le roi se vint engenoiller.
« Boins rois, fait il, ne le vos quier celer,
« Combatus suis et vaincus et matés
« Par le meillor de la crestienté.
« Dont je vos pri par droite verité
« Que pais traitiés et bonne volenté
« Avec le roi dont es genres claimés,
« Et se le faites, vos ferés grant bonté. »
Dist Kallemaines : « Bien me venroit à gré
« Se envers lui atrovasse pité,
« Que de sa fille qu’ai fait à mort livrer
« Me volsist faire pardon de tot son gré. »
Dist li Danois : « Ores li envoiés
« Un vo mesage qui soit de grant bonté,
« Qui bien parler saiche et querir pité. »
Dist l’emperere : « Et l’ai bien porpensé ;