« Se Damediex me fust onques aidans,
« Ja de ma fille sarés le covenant :
« Morte n’est mie, ains est vive et joians.
« De cest afaire se nen estes créans,
« D’ele en saurés le voir de maintenant. »
A Varocher lors a dit en riant :
« Tu ies, fait il, et saiges et vaillans ;
« A Blancheflor va sans targer noient
« Et devant moi si la mene en present,
« Qu’Ogiers la voie et Naimes ensement. »
Dist Varochers : « Vos parlés saigement. »
Atant se part, n’i fist arrestement,
Vient à la chambre où ert celéement
Avec Berart, desor un pavement.
Dist Varochers : « Dame, à mon escient,
« Je vos aporte un moult riche present.
« Li rois vos peres vos mande qu’erranment
« A lui veigniés si acesméement
« Que n’ait de vos nul blasme de noient
« Qu’aiés éu nesun encombrement.
« Véoir vos vuelent de la françoise gent
« Ogiers et Naimes, qui sont vostre sergent. »
La dame l’ot, à Dieu mercis en rent.
Grant joie en ot, si se vest richement,
Ad un fil d’or sa crigne vait nouant.
Ele et Berars se partent maintenant,
Au tref son pere venue est là devant
Page:Anonyme - Macaire, chanson de geste.djvu/469
Le texte de cette page a été corrigé et est conforme au fac-similé.
3278—3304
277
Macaire.
