« Tel colsa vos diro dont gran çoia n’averon
« Tota la cort, çivaler e peon.
« Çama in France tel çoia non veron
« Cun vu averés por le petit garçon. »
« Enperer sire, dist N. de Baiver,
« Tel novela vos avero conter
« Donde n’averés forment à merveler.
« Nen véés vos ste petit baçaler ?
« Por voir vos di, si ve le poso çurer,
« Qe por ves filz le poez clamer.
« Si o veçu Blançiflor sa mer
« Q’ella estoit en la cort de son per ;
« Non e pais morte, ançi e sana e cler. »
Quant sta novela oï l’inperer,
Sor tot ren s’en pris à merviler.
El dist à N. : « Questo non poso creenter,
« Qe, sa fose vive, nen poroit endurer
« De veoir sa çent oncir e detrençer. »
E dist N. : « E vos li poso çurer
« Qe l’o veçue e parlé al çeler.
« La pax e fata, se la volés otrier. »
Dist l’imperer : « Tropo longo el vi tarder. »
