Page:Anonyme - Macaire, chanson de geste.djvu/492

3582—3604

303

Macaire.

E la raine à son destro costé.
Jamais de ren nen fu tel çoia mené
Cun de la raine qe viva fu trové.
De Varocher e voio qe vu saçé
Ancor non est à sa muler alé,
Ne mais non vi ne fio n’erité
Dapois qe da lor el se fo desevré,
E si estoit un gran termen pasé.
Quando quel ovre el vi si atorné,
Et vi la pax e la guera finé,
A la raine el demando conçé.
« Dama, fait il, vu savés ben asé
« Li jor e li termen q’eo me fu sevré
« Da ma muler e mes petit rité,
« Si le lase in grande poverté ;
« Mais, la marçe de Deo e de vestra bonté,
« Asa o avoir e diner moené
« E bon çivail, palafroi e destré,
« Si qe in ma vie ne sero asié,
« Unde vos pri le conçé me doné. »
Dist la raine : « Eo ne son çoiant e lé. »
Ela li done d’avoir una charé.
« Varocher, dist la dama, or vos en alé ;
« Quant vu averés vestra ovra devisé,
« Venerés à la cort, q’el non soia oblié. »
Dist Varocher : « E l’o ben porpensé. »
A çival monte cun petita masné,