For qe quatorçe oit sego mené.
Ben soit la vie, qe no s’oit oblié.
Quant à sa mason el se fo aprosmé,
En me la voie oit du ses filz trové
Qe venoit del bois cun legne ben cargé,
Si cun son per li avoit costumé.
Varocher quan le vi, si le parse piaté.
A lor s’aprosme, de doso li oit rué ;
Quando li enfant se vi si mal mené,
Çascun de lor oit gran baston pilé,
Verso son per s’en vont aïré.
Feru l’averoit, quant se retrase aré
E si le dist : « Ancora averi bonté !
« Bel filz, fait il, vu no me conosé ?
« Vestre per sui qe à vos son torné,
« Grant avoir vos dono amasé ;
« Richi en serés en vestra viveté,
« Si çivalçari bon destrer secorné ;
« Çascun sera çivaler adobé. »
E quant li enfant li ont avisé,
Poés savoir gran çoia a demené.
Quant Varocher entra en sa maison,
Ne le trova palio ne siglaton,