Fors que quatorze n’en a o soi menés.
Bien set la voie, ne s’est mie oblié.
A sa maison quant se fu aprismé,
Emmi la voie a ses deus fils trovés
Qui du bois viennent de laigne bien chargé,
Si com lor peres les ot acostumés.
Et quant les voit si l’en a pris pités.
A eus s’aprisme, del dos lor a rué ;
Quant li enfant se voient mal menés,
Chascuns de lor a grant baston cobré,
Contre lor pere s’en vont tot aïré.
Feru l’éussent, quant se retrait arier
Et si lor dist : « Encor aurés bonté !
« Bel fil, fait il, donc ne me conoissés ?
« Vos peres sui qui à vos sui tornés
« A grant avoir que jou ai amassé ;
« Riche en serés en trestot vostre aé,
« Et si aurés bons destriers sojornés ;
« Chascuns sera chevaliers adobés. »
Quant ont lor pere li enfant ravisé,
Poés savoir grant joie en ont mené.
Quant Varochers entra en sa maison,
Là ne trova paile ne siglaton,