Le corps a Saint Pol je vous garde,
Qui est plain de toute douleur.
Mais pour faire son fait meilleur,
Mandés le moy ains que plus tarde,
[Si vous l’avés, mon pouvre cueur.]
Je le vous lessay, j’en suy seur,
Quant bien a mon fait je regarde !
Le feu saint Anthoine vous arde,
Quant vous le tendrés en langueur,
Si vous l’avès, [mon pouvre cueur.]
CLXV
Itasse de Lespinay
uant serés vous contens, mes yeux ?
Par Dieu, jamès, je le voy bien,
Tant que puissiés le doulx maintien
Veoir de celle que j’ame mieulx.
Tous aultres regars anuyeux
Vous sont mès, en parlant du sien :
[Quant serés vous contens, mes yeux ?]
En est il point desoubz les cieulx,
Disons, et n’en mentons de rien,
Qui l’aprouche ? non, je le tien :
Mais, pour moy fere tant joyeulx,
Quant serés vous [contens, mes yeulx ?]
