DESESPERANCE D’AMOUR
En le temps où le roy Charles huictiesme eut la phantaisie d’aorner le chasteau d’Amboise, vindrent avecques luy aulcuns ouvriers italians, maistres sculpteurs, bons peinctres et massons, ou architectes, lesquels feirent ez galeries de beaulx ouvraiges qui, par délaissement, ont esté prou guastez.
Et doncques, la Court estoyt lors en ce plaisant séiour, et, comme ung chascun sçayt, le bon ieune sire aymoyt moult à veoir ces gens élaborer leurs inventions. Estoyt lors parmy ces sieurs estrangiers ung Florentin ayant nom messer Angelo Cappara, lequel avoyt ung grant mérite, faysoit des sculpteures et engraveures comme pas ung, nonobstant son aage, veu que aulcuns s’esbauldissoyent de le veoir en son apvril et désià si sçavant. De faict, à peine frizotoyent en son guernon les poils qui empreignent
