Puis, avant qu’il eust reveu les toicts de la Roche-Corbon, il avoyt dict au sire de Montsoreau d’aller chercher en son pays une poignée d’umbre, ce que le ieune Gauttier feit, cognoissant les erremens de son seigneur. Le senneschal se pourveut, au lieu et place dudict Gauttier, du fils au sire de Iallanges, lequel fief relevoyt de la Roche-Corbon. C’estoyt un ieune gars ayant nom René, approuchant quatorze ans, dont il feit son paige, en attendant qu’il eust l’aage d’estre escuyer, et donna le commandement de ses hommes à ung vieulx stropiat avecques lequel il avoyt moult roulé en Palestine et aultres lieux. Par ainsy, le bonhomme cuyda ne point chausser le harnoys branchu de cocquaige, et pouvoir encores sangler, brider et reffrenner le factieux pucelaige de sa femme, lequel se demenoyt comme une mule prinse en sa chorde.
