du Louvre, ou il eut toujours les dames a soupper qu’il envoyoit convier, et cinq ou six princes, ou de nous quy estions venus avec luy.
En fin la reine arriva a Nemours, et le roy, courant a soissante chevaux de poste, l’y alla trouver, et la mena a Fontainebleau, ou ayant demeuré cinq ou six jours, elle arriva a Paris, logée cheux Gondy[1]. Le mesme soir le roy luy presenta madame de Verneuil, a quy elle fit bonne chere. Nous allames de la loger cheux Zammet, parce que le Louvre n’estoit pas encores appresté. En fin la reine y vint loger, et le lendemain elle s’habilla a la françoise, prenant le dueil de la reine Louyse. Nous dansames quelques ballets, et courusmes en camp ouvert sur le pont au Change au caresme prenant[2].
Je pris congé du roy pour aller en Lorraine voir ma mere mallade, ou je demeuray pres de trois mois, et revins comme madame de Bar et S. A. son beau-pere vindrent en France voir le roy (juin), quy vint au devant d’eux a Monceaux qu’il avoit peu de jours auparavant donné a la reine, quy fit de grands festins a sa belle-sœur et a Mr de Lorraine. Ce fut la ou j’ouis un conseil[3], ou le roy me fit demeurer, de peur que je ne m’en allasse a Paris, parce que je luy gaignois son argent : il demanda sy il donneroit quelque chose a madame de Verneuil pour la marier a un prince qu’elle disoit la vouloir espouser sy elle avoit
