et nous, ses enfants. Toutes ces raysons estoint suffisantes pour me faire apprehender de me mettre en lieu ou il eut toute puissance, et moy desnué d’assistance et d’amis. C’est pourquoy le soir, apres soupper, je communiquay cette doute a mon cousin le reingraf, qui entra dans mon sentiment, et me desconseilla d’aller en l’armée, sy je n’avois de bonnes precautions precedentes, et qu’il estoit d’avis que je m’en allasse en Transilvanie sous le general George Basta[1], amy de feu mon pere, et homme de grande reputation pour les armes. Nous en demeurasmes la pour ce soir, et le lendemain il me mena faire la reverence a l’archeduc Ferdinand, depuis empereur, lequel me fit bon accueil. Ce mesme matin vint aussy a l’audience le docteur Pets[2], un des principaux conseillers de l’empereur Rodolphe, arrivé le soir auparavant a Vienne, ou l’empereur l’avoit envoyé pour conferer des affaires avec l’archeduc son frere ; lequel estoit amy du reingraf quy me le fit aussy saluer : et comme il estoit homme libre[3], il dit au reingraf que s’il luy vouloit donner a disner ce jour la, il luy feroit plaisir, parce qu’autrement il iroit disner tout seul à l’hostellerie ; le reingraf luy dit qu’il le meneroit diner cheux un autre luy mesme, quy estoit moy, son cousin
- ↑ Georges Basta, célèbre général des armées impériales, auteur d’un livre sur le gouvernement de la cavalerie légère, avait récemment fait la conquête de la Transylvanie, où il livra encore, en septembre 1603, un combat important.
- ↑ Le docteur Petzen, jurisconsulte, conseiller et négociateur de l’empereur Rodolphe II.
- ↑ Homme libre, traduction du titre de Freiherr, libre seigneur, ou baron ne relevant que de l’Empire.
