XIX.
Que les Daulphins ne soient voutez ne courbez nõ plus en la mer que sur terre.
I’AY biẽ voulu toucher un poinct de la courbure des Daulphins : Car quant a euls, ils ne sont pas courbez, comme on les met en peĩcture, & n’est aussi trouvé que Aristote ne autre autheur anciẽ digne d’estre creu, qui ait onc escript que les Daulphĩs soyẽt voutez. Et cõbien que Pline & Ovide ont dict dorso repãdo, ce n’est pas a dire que tout le corpz soit vouté, car il n’y ha que le dos. L’erreur vient dont ie diray : C’est qu’on les apperçoit souvent saulter en l’air & qu’en saultãt leur sault n’est pas de s’estancer en l’air droict contremont, ne aussi de retumber droict d’ou ils sont sortis, comme sont les Pelamides, & les Tons : mais c’est que quand ils viennent hors de la mer, poulsez de grande roideur, en se dardant impetueusement, ils sortent la teste la premiere : & quand ils retumbent, ils vont moult loing de l’endroict dõt ils sont issus, tellemẽt qu’ils retũbent si droicts sur le bout de la teste, que leurs queues demeurẽt quelque temps hors l’eaue. Et pource qu’on a veu, que leur sault ha faict la perspective d’un demy cercle, lõ a cuidé que celle rõdeur provint de la forme de leur corps : mais cela est fauls. Et qu’il ne soit vray, soit pris un baston pour exemple, & qu’un homme le iecte de la poincte du pied en l’air, & qu’il vienne tomber sur l’autre bout : ceuls qui serõt loing, l’auront veu prẽdre un tel tour de demy cercle, qu’il aura semblé que le baston mesme ait esté courbé. Et si les Daulphins estoiẽt courbez en la mer, aussi le seroient ils en terre quand ils y sont apportez. Ceci soit dict touchant de sa curvité. Les peinctres les peuvent bien peindre courbez, & leur peuvent faire retenir leur nayfue figure : mais toutesfois qui veult parler du naturel, il n’est nullemẽt courbé : chose que ie pourray prouver par moult grand nombre de Daulphins portraicts en plusieurs medalles fort antiques, tant en or, argent, qu’en cuyvre : qu’il a pleu a monsieur le tresorier Grollier me mõstrer, esquelles sont representez les Daulphins, dont la plus grãde partie sont touts droicts, comme nature les ha produicts.
