terre, lesquelles appercevãts l’esmerillon qui les attent, se sentãts combatues de deux necessitez, l’une des chiens, & l’autre de leur ennemi capital, aiment mieuls chercher salut entre les iambes des chevauls, ou bien se rendre en la gueulle des chiens, que d’experimẽter la merci de celuy duquel elles n’esperẽt que la mort. Semblablement les poissons craignants les Daulphins, esperent se saulver en l’air, mais les oyseaux que les Grecs nõmerent Laros, les Latins Gavia, & les François Mouettes, & les autres nommez Carulos, ou Caniards, qui suivẽt les Daulphins a grãdes bandes, cognoissants leur effect (aussi sont ils causes de les enseigner : car quelque part que les Daulphins aillent, lesdicts oyseaux vollent tousiours au dessus) descendent de roydeur sur toute la multitude de ce poisson espouvanté, qui mieuls avoit aimé se mettre en leur misericorde, que d’essayer celle du Daulphin qui le va pourchassant par la mer. Mais estant tourmenté de toutes parts, fuiãts les deux inconvenients & cherchãt son dernier refuge tel que nature luy a apprins, il se renge au rivage de la mer : ou encore pour la tierce fois, il tombe en plus grande necessité qu’au paravãt. Car il se donne en la puissance de celuy lequel il ne peult fuir, estant si estonné de la paour qu’il ha eu, que mesmement il se laisse prẽdre avec la main, ou bien demeure pris es rets. Voyla comment les Daulphins errants par la mer vagabons, maintenant ça maintenant la, & commençants du matin, vont celle part ou ils ont constitué l’estape de leur desieuner. Tout ainsi font ils de leur disner, & finablement font le semblable de leur soupper : par ainsi ils font quasi tout le iour en pourchas. C’est la raison pourquoy ils sont tant aimez des pescheurs, pource qu’ils ameinent le poissõ de toutes parts iusques dedens leurs rets. Aussi en ont ils recompense, car les pescheurs ne leur font iamais mal. Et encor s’ils les trouvent prins en leurs filets, il leur donnent liberté. Ie ne vueil entendre que cela se face en toutes mers, mais principallement en Grece & autres lieux ou les habitants ne mangent point de Daulphin.
