François eſtant arriué de nouueau ; pour tout compliment, elle luy priſt la main, & luy fit faire le ſigne de la Croix. Souuent elle ſe trouue dans la campagne quand nos Peres y recitent leur Office, elle ſe tient dans le chemin, & preſque autant de fois qu’ils ſe retournent, elle ſe met à faire le ſigne de la Croix, & à prier Dieu à haute voix.
Vne autre petite nommee Catherine, auoit fait ſouvent la difficile à ſe faire inſtruire, & en ſuite n’auoit point eſté recompenſee comme les autres : quelques iours apres vne ſienne compagne l’amena à vn des noſtres, luy faiſant accroire qu’elle eſtoit toute diſpoſee à dire, mais quand ce fut au fait & au prendre, elle fit à l’ordinaire ; alors ceſte petite qui l’auoit amenee ſe miſt en humeur, & employa toute ſa petite rhetorique naturelle pour luy déſerrer les levres, & la faire parler, tantoſt vſant de menaces, tantoſt lui faiſant espérer quelque recompenſe de moy, ſi elle diſoit bien, & fit ſi bien qu’elle en vint à bout au grand contentement de celui des noſtres qui l’eſcoutoit.
Vn autre bien qu’apporte ceſte practique conforme à noſtre Inſtitut, eſt que les grãds meſmes demeurent par ce moyen inſtruits ;
