ſoit peu reculé, il luy en couſtoit vn preſent de ſept cens grains de Pourcelaine, qu’ils appelloient haſſahendiſta ; pour luy il demeuroit en cet eſtat tant & ſi long temps qu’il plaiſoit aux parens du defunct ; & encore apres cela pour en ſortir luy falloit-il faire vn riche preſent qu’ils appelloient akhiataendiſta. Que ſi les parens du mort ſe vengeoient de cette iniure, par la mort de celuy qui auoit fait le coup, toute la peine retomboit de leur coſté ; c’eſtoit auſſi à eux à faire des preſens a ceux meſmes qui auoient tué les premiers, ſans que ceux cy fuſſent obligez à aucune ſatisfaction, pour montrer combien ils eſtiment que la vengeance eſt deteſtable, puis que les crimes les plus noirs, tel qu’eſt le meurtre, ne paroiſſent quaſi rien en ſa preſence, qu’elle les abolit, & attire deſſus ſoy toute la peine qu’ils meritent. Voila pour ce qui eſt du meurtre : les bleſſeures à ſang ne ſe gueriſſent auſſi qu’à force de preſens de colliers, de haches, ſelon que la playe eſt plus ou moins notable.
Ils puniſſent auſſi ſeuerement les Sorciers, c’eſt à dire, ceux qui ſe meſlent d’empoiſonner, & faire mourir par ſort ;
