1268, 23 mars.– Viterbe
Le pape Clément IV approuve la fondation et les statuts du collège de la Sorbonne, situé dans la rue aux Portes devant le palais des Thermes et destiné à accueillir de « pauvres maîtres étudiant à la faculté de théologie », protège ses maisons, ses propriétés et ses biens, règlemente l’élection de son proviseur par les autorités ecclésiastiques parisiennes et universitaires, donne pouvoir au proviseur de recruter ces maîtres, issus de la faculté des arts, et lui donne l’obligation de rendre des comptes annuels aux dites autorités.
Archives nationales (Paris), L//262, no 109 (AE/II/1814)
Clemens episcopus, servus servorum Dei, dilecto filio provisori pauperum magistrorum et ipsis magistris in theologica facultate studentibus, in vico ad Portas ante palatium de Termis Parisius sub communi vita degentibus, salutem et apostolicam benedictionem. Suadente nobis gratia bonitatis qua virtutum studiis insistentes, sacre pagine cupitis munire dogmatibus, et in hiis alios erudire, in unum convenistis vivendi commertium et commune vobis habitaculum elegistis. Volentes itaque vobis et statui vestro apostolicum exhibere favorem, convictum et cohabitationem vestram duximus approbandos, jure venerabilis fratris nostri Parisiensis episcopi semper salvo, auctoritate presentium districtius inhibentes ne quis domos, possessiones et alia bona vestra que impresentiarum rationabiliter possidetis aut in futurum justis modis prestante Domino poteritis adipisci, invadere, distrahere vel occupare presumat seu aliis usibus applicare. Nichilominus quoque statuimus et etiam ordinamus ut te, fili, provisore obeunte, nullus in locum tuum per fraudis astutiam apponatur, nisi quem loci archidiaconus, cancellarius Parisiensis ac magistri Parisius actu regentes in theologica facultate necnon decretistarum et medicorum decani, rector universitatis Parisiensis et procuratores quatuor nationum communiter vel major pars eorum duxerint apponendum idemque provisor in congregatione vestra pauperes magistros et idoneos qui rexerint in artibus, de quacumque sint natione, possit admitttere ac exinde minus idoneos amovere, prout inspectis circumstantiis universis viderit expedire, qui etiam de dictorum magistrorum receptis et expensis annis singulis archidiacono, cancellario et aliis supradictis vel aliquibus ab ipsis vel a majori parte ipsorum qui ad hoc extiterint deputati, teneatur reddere rationem ; archidiaconus insuper, cancellarius et alii memorati seu major pars eorum provisorem quem duxerint statuendum amovere valeant prout viderint faciendum. Nulli ergo omnino hominum liceat hanc paginam nostre approbationis, inhibitionis, constitutionis et ordinationis, infringere vel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum ejus se noverit incursurum. Datum Viterbii, X kalendas aprilis, pontificatus nostri anno quarto.
