Page:Castets - La Chanson des quatre fils Aymon, 1909.djvu/907

La bibliothèque libre.
Le texte de cette page a été corrigé et est conforme au fac-similé.
879
les quatre fils aymon

17950Molt sont esmerveillié, si ont [male] esperance,[1]
Quant [ne] virent Renaut, ò avoient creance,
Que d’oïr les matines avoit en costumance.[2]
Li chapelains [les] vit, par aïr s’i avance,[3]
Renaut a demandé [a quoi] fait detriance.[4]
17955« Sire, dist Aalars, par veraie creance,
Ge cuit qu’il est malades o il a grant pessance.
Baron, alons veoir .i. po sa contenance. »
[Adonques si alerent, qui miex miex s’i avance.[5]
Quant il ne l’ont trové, si furent en dotance ;
17960« Baron, ce dist Richars, si ait m’ame alejance,]
« Vez ci tote sa robe et sa reconoissance,
Et chauces et solliers et s’espée et sa lance ;
[Laiens] est ses chevax, si ait m’arme aïdance ;[6]
Ge lo vi or torchier, bien quenois sa samblance. »

17965Ensinc com li baron estoient effraé,
Estes vos lo portier dolant et esgaré,
Hautement s’escria, comme s’il fust iré :[7]
« Par Dex, seignor baron, Renaus s’en est alé
Toz nu piés et en langes, comme hon esgaré.
17970Ennuit, à mie nuit, deguerpi la fierté.[8]
Il vos mande par moi, por sainte charité,
Se vos onques l’amastes nul jor en son aé,
Si vos portes honeur et fine loauté,
Et ait cascuns sa part si com a devisé,
17975Que jamais nel verres en cest païs torné.
Il va s’arme sauver, molt est defiguré.
Son anel me dona que molt avoit amé. »
Quant li baron lo virent, à pou ne sont desvé.
« Haï ! las, dient il, com somes escaré !
17980Perdu avons no frere lo vaissal aduré. »

  1. 17950 L bone. B male.
  2. 17952 B ajoute : Qu’il avoient en Diu moult trez boine fianche.
  3. 17953 L ie. B lez.
  4. 17954 L à qui fait. B por coi fait. A qui lor.
  5. 17958-17960 Pris de B. L manque. A un vers : Atant i sont alez, n’i ot plus attendance.
  6. 17963 L Lais est. B Laiens est sez chevaus.
  7. 17967 B derves.
  8. 17970 A Ennuit du premier somme issi de la cité. B Anuit à mienuit. Dans L Michelant lit En vint.