Page:Castets - La Chanson des quatre fils Aymon, 1909.djvu/1013

La bibliothèque libre.
Le texte de cette page a été corrigé et est conforme au fac-similé.
985
appendice

ilz commencerent a moderer leur dueil. Et lors Alard qui estoit l’aisne apres Regnault leur dist. Seigneurs puys quil vous plaist de savoir qui nous sommes et comment ce corps s’appelle ie le vous diray tout a present sans nulle faulte. Vous devez savoir que ce corps fut appelle regnault de montauban le vaillant et preux chevalier et nous troys qui sommes icy sommes ses freres et bien say que vous avez ouy parler des quatre filz aymon lesquelz Charlemaigne roy de france guerroya si longuement. Adonc quant l arcevesque et le peuple ouyrent que cestoyent les quatre fils aymon desquelz tout le monde parloit et que le corps saint estoit regnault de montauban le noble et vaillant chevalier, ilz se mirent tous à plourer de pitie et de ioye de ce quilz veoyent devant leurs yeulz le plus vaillant chevalier de tout le monde qui estoit mort au service nostre-seigneur faisant penitence. Après ce que les troys freres eurent ung peu delaisse leur dueil ilz firent mettre en sepulture leur frere moult honnorablement et le mirent dedens ung riche tombeau lequel larcevesque avoit fait faire la ou le saint corps est encores comme chascun scet. Et est appelle saint regnault martyr. La memoire de luy fut mise en escript autentiquement et en fait lon chascun an grant solennite et feste au pays de pardela. Apres l’enterrement du corps saint ses freres sen retournerent en leur pays. Mes beaux seigneurs qui ce present livre lirez nous prions dieu et le glorieux corps saint quil nous doint grace de vivre en bonnes euvres. Par lesquelles nous puissons avoir en la fin de noz iours vie eternelle et la gloire celestielle de paradis.

AMEN.

Ci finist l’istoire du preux et vaillant chevalier
Regnault de Montauban. Imprime à lyon par
Jehan de vingle. L’an mil quatre cens nonante
le quatriesme iour de novembre.