Mais sa gent i corurent par ire randonant,[1]
Sus le font relever tantost demaintenant.[2]
Quant li dus fu sor piés, ne s’ala atarjant :
Il va ferir Loihier de l’espée tranchant,
Que li hiaumes du chief ne li fist tensement.
Entreci qu’el menton l’ala tot porfendant
Que mort l’a abatu desor le pavement.
Li dus Bues s’escria : « Baron, feres avant !
Mar en eschaperont li petit ne li grant. »[3]
Mors est li fiux le roi ki avoit nom Loihier,
Que tramist Charlemaignes, l’emperere au vis fier,
Au duc Buef d’Aigremont à loi de mesagier.[4]
Hé Dex, com grant damage et com grant encombrier !
Puis en avint el reigne .i. si grant destorbier
Que il en furent ars tant chastel, tant mostier,
Tant orfenin clamé, tante weve moillier
Et tant chevalier mort au fer et à l’acier.
Huimais orres chançon qui molt fait à prisier,
Si com s’en retornerent li nobile princier.
Or est li vasaus mors qui tant fist à prisier.[5]
Savari apela dus Bueves li guerrier.
« Vasaus, ce dist li dus, garde ne te targier.
Voidies me tost ma vile, sanz point de delaier.
A Charlon porteres son vaillant fil Loihier ;
Je n’ai d’autre treü que li doie envoier.
Asses li ferai mal, se il weut guerroier. »[6]
« Sire, dist Savaris qui le corage ot fier,
Ne vos esmaies mie, il vos fera irier ;
Car ençois que li mois soit passés de fevrier,
Venront à vostre porte tel .lx. millier,[7]
[Trop bien armez d’aubers et de fer et d’acier] :[8]
- ↑ 695 B i akeurent par ire maintenant. C passe le vers.
- ↑ 696 B tost et isnelement. C tost et delivrement.
- ↑ 703 BC S’il ensi nos eschapent, dont somes nos enfant.
- ↑ 706 BC en liu de.
- ↑ 714 B Or est mors li gentis c’onques n’ama lanier. C qui ainc n’ama.
- ↑ 720 BC Autre anui li ferai se jou puis esploitier.
- ↑ 724 BC .cm chevalier.
- ↑ 725 Sic C. B Très bien armé. L n’a pas le vers qui d’ailleurs n’est pas indispensable.
