Acordons nos au roi par le mien loement.
Droit et raisons ferons par le cors saint Amant.
Et se il ne le fait, soions preu et sachant ;
Li tors ira sor lui, si ira malement.
A lui nos combatons ens el pré verdoiant. »
« Sire, c’est bien à faire, dient li combatant,
Fouques et Amadex i voisent maintenant. »
Et cis sunt apresté, ne se vont delaiant ;
Sor les muls afeutrés i vont esperonant.
Porterent rains d’olive ; c’est senefiement
De pais, d’umilité, que il la vont querant.
Jusk’al tref Charlemaigne ne se vont atarjant.
Charles sist au disner o Naimon le ferrant.
Fouques, li nies Girart, a parlé hautement :
« Cil Dame Deu de gloire qui fist Eve et Adan,
Et terre et ciel et lune à son commandement,
Ki por nos rachater sofri paine et haan,
Il saut le meillor [roi] qui onques fust vivant :
De par Girart le duc, si vos vient à talent[1],
Pais et amor vos quiert por Deu le roi amant ;
En la vostre merci s’ira Bueves metant
Et seront en ostage .c. chevalier vaillant.
Jamais tant com il vive n’a vos n’a vostre gent
Ne forfera li dus la monte d’un besant.
Au Sepucre en ira, se tes est vo commant.
De vos tenra sa terre et tot son chassement.
Si pardones la mort Loihier le combatant.
De Doon de Nantueil vos redi autretant.
Lor neveus aves mort à vo acerin brant.
Laisies les autres vivre, por Deu le tot poisant. »
Et quant li rois l’oï, si se va embronchant ;
D’une grande loée n’ala .i. mot sonant
Et quant il a parlé, si cria hautement :
« Par Deu, Fouques, dist il, je n’en ferai noiant.
Se puis tenir Buevon, pendus sera au vant.
Mar i ocist mon fil que je amoie tant. »
« Sire, dist li dus Naimes et li dus Galerant,
- ↑ 1371 Roi manque au ms.
