Et ici, desor Sains, certes vos jureron
Que jamais en nos vies rien ne vos forferon. »
Et quant Charles l’oï, s’abaisa le menton.
Les barons en leva bonement, sens tençon,
Par itel covenant, comme nos vos dirom,
Qu’il l’iroient servir tot à l’Acension.
« Seignor, dist Charlemaignes, ententes ma raison :
Vos me venres servir à Paris, ma maison,
Si que bien le verront mi prince et mi baron. »
Et li frere respondent : « Vostre comant ferom. »
Atant sunt departi que plus n’i ot tençon,
Et li .i. baisa l’autre par bone entencion.
Li os se departi entor et environ ;
Charles vint à Paris, Girars à Rosillon
Et Doons à Nantueil, dus Bues à Aigremon ;
En pais cuiderent estre icil gentil baron.
En France ot .i. linage cui Dame Dex mal dont :
Ce fu Grif d’Autefueille et son fil Guenelon,
Beranger et Hardré et Hervi de Lion,
Antiaumes li felon, Fouques de Morillon ;
Vindrent à Charlemaigne, si l’ont mis à raison :
« Par ma foi, empereres, molt nos esmerveillon
Que vos ames issi le bon duc d’Aigremon
Qui ocist vostre fil com traïtes felon.
Quant vos li pardones, molt nos en merveillon.
Sire, frans empereres, car en pren vengisson
Et se le weus graer, molt bien t’en aideron,
En itele maniere ja resté n’en serom, »
« Baron, dist Charlemaignes, ce n’est mie raison,
Puisque amaisnié somes, que issi l’ocion. »
« Si est, par ma foi, sire, ce respondi Foucon ;
Car il ocist ton fil par mortel traïson.
Il en doit bien morir, que issi l’otriom.
S’or en avons l’otroi de vos, sel gaiteron
Ens el chief de Borgoine, es vaus de Florion ;
Là serons acosté par dejoste le mont
Et seront owec nos .cccc. compaignon ;
Et se il nos eschape, çou sera dervison. »
Et respont l’empereres : « Molt tres bien l’otrion.
Page:Castets - La Chanson des quatre fils Aymon, 1909.djvu/330
Cette page a été validée par deux contributeurs.
318
les quatre fils aymon
