Trestot le porfendi desi ens el menton ;
Del cheval l’abat mort, il ne dist o ne non.
« Outre, ce dist li dus, à Deu maleïçon !
Ja ne te venteras nul jor en ton roiom,
Que tu m’aies tolu la monte d’un bouton. »
Ja fust montés li dus sor l’auferrant gascon,
Quant il vint à poignant Fouques de Morillon,
Et tenoit une lance qui le fer avoit bon.
Le duc fiert à travers sor l’auberc fremillon ;
Le hauberc li fausa si com .i. auqueton :
Parmi le cors li met son vermeil confanon,
Tant com lance li dure, l’abati el sablon
Et puis s’est escriés : « Car i feres, baron,
Kar li dus est ocis ki fist la traïson.
Se vos le comandes, le chief en porteron
Et devant Charlemaigne si le presenteron. »
Et cil ont respondu : « A Deu beneïçon. »
Or est li dus Buevons parmi le cors navrés,
Et Grifons d’Autefueille sache le branc letré
Et fiert le duc Buevon parmi l’elme gemé ;
La teste li copa, si chaï ens el pré.
Or est Loihiers vengiés, li vasal aduré,
Et li autre baron se sunt entrencontré.
Trestot i furent mort li baron honoré,
Ne mais .x. compaignons qu’ici en ont sevré ;
Cil ont pris le cors Buef et en biere levé ;
Arrier l’enporteront, que sor Sains l’ont juré.
Cil s’en tornent plorant, n’i ont plus demoré,
O dolor et o cri, ce sachies de verté.
Des jornées qu’il font n’i ara plus conté.
Tant ont par lor jornées chevauchié et erré,
K’à une matinée entrent en la cité.
Li baron qui l’enmainent, si se sunt escrié :
« Helas ! que devenrons, chaitif, maleüré !
Charles, li empereres de France le regné,
A fait tuer le duc par grant desloiauté. »
Es vos parmi la vile le cri en haut levé ;
Desi que el chastel l’a on bien escouté.
La ducoise l’oï, si a grant duel mené ;
