Quant je les adobai, molt fis que fox provés.
Mais je cuidai mes cors fust par eus honorés,
Qui ont mort mon neveu dont je sui controblés.
Or ont pendu mes homes et au vent encroés
Et m’enseigne de joste, dont je sui vergondés.
Mais par icel apostre c’on quiert en Noiron prés,
Jamais ne finerai, ses aurai vergondés. »[1]
« Sire, ce li dist Fouques, par mon chief droit aves
Et Renaus est molt fos et trop desmesurés ;
Quant il pendi l’ensaigne, molt par fist que dervés. »
« Voire, ce dist dus Naimes, de çou sui je irés.
Quant il s’en entremist, nel fist pas par mes grés.
Ves com ele baloie, por Deu, or esgardés. »
L’empereres s’embronche, vers terre s’est clinés ;
Il ne l’esgardast mie por .xiiii. cités.
Et Renaus et si frere en sunt as murs montés.
« Seignor, ce dist li quens, à moi en entendes.
Bien nos vient, merci Deu qui en crois fu penés.
A poi que je ne sui ocis et afolés.
Ki bon conseil saura, por Deu me soit donés.
Cist chastiaus est molt povres, essilliés et gastés,
Où solïons avoir la joie et les bontés.
L’avaine avons perdue et les vins et les blés
Dont j’estoie çaiens riches et asazés ;
Se nos plus i estons, ce sera foletés. »
[Issons nos en là hors, se vos le me loes,[2]
Devers ces Alemens soit nostre effors tornés.
Alons en Ardanne dont on nos a getés,
Car quant nos en issimes ce fu grant foletés]. »
Et cil li respondirent : « Si com vos comendes.
Nos ne vos faldrons ja de quanque vos voldres. »
Adonc fu li hernas richement aprestrés
Et trestot li somier et chargiés et trossés ;
As escuiers les ont maintenant delivrés.
Puis vestent les haubers, s’ont les helmes fermés
Et çaingnent les espées as senestres costés ;
Tant atandent ensamble que li jors est finés.
Page:Castets - La Chanson des quatre fils Aymon, 1909.djvu/374
Cette page a été validée par deux contributeurs.
362
les quatre fils aymon
