Entresi [qu’]à Poitiers ne s’aseürent mie.[1]
Del roi Yon de Gascoigne ont la novele oïe.
Il est preus et cortois et de grant segnorie.
Par devers cele marce a grant mestier d’aïe.[2]
« Cosins, ce dist Maugis, nel lairai nel vos die.
Li rois est molt prodom et de grant manantie
Serves le jusq’à Paskes, une feste joïe ;
Ases tost vos fera de son regne partie.
Tel cose i poroit estre commencie et bastie,
Ne nos i pendroit Charles à nul jor de sa vie. »
« Cosin, ce dist Renaus, ne vos en faudrons mie. »
Et trespassent les teres, s’unt lor voie acoillie.
Par de delà Poitiers, à une herbergerie
Sont venu apres vespres, quant nuis fu aserie ;
Cele nuit i remestrent jusqu’à l’aube esclarcie.
Si entrent en lor voie, Dame Deux les conduie.
Entresci qu’à Bordiax ne s’atargierent mie.
Le roi Yon i truevent a grant cevalerie.
Au piet du pont descendent par devant l’abeïe ;
Sor un peron de marbre, soz l’olive florie[3],
Descent li cuens Renaus à la cière hardie.[4]
Reignaus, li fix Aimon, est en Bordiaux entrés.
« Alons nos herbergier », dist Guichars li senés,
« Cousin, dist Amaugis, se vos plaist, non feres.
Ains parlerons au roi, se croire me voles,
Et se il vos detient, Dex en soit aürés,
- ↑ 3685 L q’a. À partir de ce vers, B C concordent de plus près avec L.
- ↑ 3688 B ajoute : Que grant guerre li fait chele gent païennie.
- ↑ 3704 B sous une ente foillie.
- ↑ 3705 B introduit un résumé de ce qui va suivre :
Or commenche canchon qui des le tans Elye
Ne fu si boine en plache par jougleors oïe,
Ensi com Montaubens et la tor fu drechie
Qui tant par fist Karlon anui et felonie ;
Ensi comme Renaus à la chiere hardie
Conquist le roy Begon à la tiere enermie :
La bataille fu grans et fiere l’aatie ;
Et comme il emporta la couronne polie
Del riche roy Karlon qui Franche a eu baillie
Quant il vainqui le cours devant la baronnie
Quant bien li fist Maugis à ichele envaïe.
