Ves ici les barons qu’issent de la cité,
Qui garde[nt] cele vile, le castel honoré.[1]
Aconduis les avons oïr vostre pensé. »
Et respont Charlemaignes : « Ja lor sera mostré.
Si gardes le castel desi à l’avespré ;
Se vos i puis trover demain à l’ajorné,
Et je vos pre[n]g à force, par mon grenon meslé,[2]
Trestos seres pendu, n’i aura aresté. »
« Sire, dist Hermenfrois, ci a male amisté ;[3]
Ains vos rendron la vile que aion tel sodé.[4]
Rendes nos nos destrers et nos armes doré :
Nos vos rendron la tor, n’i auera demoré. »
Cil s’en tornent atant, de color sunt mué ;
Lor gent en font issir, si sunt acheminé
Droitement vers Gascoigne, sunt ensamble josté ;
Et no François monterent el palais seignoré.
Naimes et Videlons ont Charlon apelé.
« Sire, ce dist li dus, trestot est delivré ;
Bien i poes jesir à vostre volenté. »
« Ne place dame Deu, dist Charles l’aduré,
Que m’ost soit des[t]endue ne ma gent destravé ;
Mais metes mon avoir en cel chastel quarré.
Si le gardent sergent qui soient bien armé ;
Car se Maugis le set, tot le m’ara emblé.
Naimes, dist Charlemaignes, cist est tost aquité ;
Ainc n’i ot lance fraite ne escu estroé.
S’autretel fait Renaus ne Aallars l’ainsné,
Tost aurom de Gascoingne le païs aquité. »
Ogiers dist coiement .i. poi de son pensé :
« Ja dame Deu ne place, k’ait espée au costé,
S’ençois n’est de vo part chierement comperé. »
Au siege à Monbandel fu Charles li membrés.
- ↑ 5658 L garde.
- ↑ 5663 L preg.
- ↑ 5665 M chen dist Gaufroi.
- ↑ 5666 L renderon.
Tout cet épisode de Montbendel est dans L d’une extrême platitude. La légende voulait deux sièges successifs.Dans aucune des versions cette partie du récit n’est intéressante ; elle s’égaie dans celles où est donné l’épisode de la chasse. Il sera reproduit dans l’Appendice.
