Page:Castets - La Chanson des quatre fils Aymon, 1909.djvu/492

La bibliothèque libre.
Le texte de cette page a été corrigé et est conforme au fac-similé.
464
les quatre fils aymon

6440Qui plus estoit vermeille que rosse de rossier
Et plus blance d’asses que n’est la nois sor giel ;
Awec li ses enfans que ele ot forment chiers,
Aymonet et Yonet qui molt font à prisier.
La dame voit Renaut, si le cort embracier.[1]
6445« Dame, ce dist Renaus, à celer nel vos quier ;
Molt vos doi tenir chiere et amer et prisier,
Car li rois vostre freres s’est por moi traveilliés,
En la cort Charlemaigne durement laidengié
Et si m’a envers lui acordé et paié.
6450Ce ne peüst pas faire Rollans ne Oliviers
Ne nus des .xii. pers qui molt font à prisier.
Quites tenrons de lui nos terres et nos fiés
Et si aurons asses et argent et ormier.
Si en donrons asses as barons chevaliers,
6455As sodoiers del reine, qui vos auront mestier. »
« Sire, ce dist la dame, Dex en soit graciés.
Où sera l’acordance ? gardes, nel me noies. »
« Dame, ce dist Renaus, jel dirai volentiers.
Es plains de Waucolors nos covient chevaucier,
6460Entre moi et mes freres que je ai forment cier,
Aallart et Guichart et Richardet le fier ;
Mais nos n’i aurons ja palefroi ne destrier,
Riche hauberc ne hiaume ne escu de quartier,
Sor nos muls aragons irons esbanoier.
6465S’aurons rosses es mains et flors par amistié.
Illuecques troverons Charlemaigne au vis fier
Et Naimon à la barbe et le Danois Ogier. »
Quant l’entendi la dame le sens cuide changier ;
M 171Où que voit son seignor, dist li sens detrier :
6470« Sire, vos n’ires mie, se le voles laisier.
Li plain de Vaucolors font molt à resoignier.
Une roce i a haute, contremont, vers le ciel ;
Molt est l’eve parfonde et grant sunt li rochier.
.iiii. fores i a, si com j’oi tesmoignier ;

  1. 6444 Le ms. de Metz, qui, avec M, concorde habituellement avec L, s’en sépare pour l’entretien de Clarisse et de Renaud où il suit la version BCV, qui est plus développée.