Et regarde ses freres ki bon chevalier sunt ;
Tex josteors de lance ne trovast on el mont.
De vrai cuer et de bon commence une orison :
« Glorieus sire pere, par vo saintisme non,
Qui formastes le ciel à vostre election
Et fesistes la terre sor le marbrin perron,[1]
Biau sire, si fesistes ewe douce et poisson,
En terre conversastes, biau sire, com autre hom.
Marie Madaiglaine fesistes le pardon.
Biau sire, en Betanie suscitas Lasaron
Et Daniel salvas en la fosse au lion
Et garistes Jonas el ventre del poison ;
Pieres, Andrius et Pols, tot troi li compaignon,
Ki en la mer estoient, peschoient au poison.
Illuec les convertistes par bone entencion ;
Judas, li maus traïtres, vos vendi à bandon
As mescreans Gius, molt en ot povre don,
.xxx. deniers en prist, ci ot grant mesprison.
Biau sire, en sainte crois, sofristes passion
Et Longis vos feri d’une lance à bandon ;
N’avoit ainc veü goute, que de fi le set on,
Li sans vint avalant par la hante à bandon ;
Il le tert à ses iols, si ot alumoison.
Sire, le jor de Pasques eüs surresion
Et montastes el ciel à jor d’Acension
Et revenis à nos, si com nos le trovon ;
Ensi com çou est voir et nos bien le creon,
Si garis hui mon cors de mort et de prison,
Et mes freres tos .iii. qui bons chevalier sunt.
Je ne sai où jes maing, mais en grant peril vont. »
Adonc plora des iols Renaus li fils Aymon.[2]
Aallars le regarde, si l’a mis à raison :
« Ahi ! frere Renaut, ses i tu se bien non ?[3]
En tantes fieres coites avons requis Charlon ;
Si n’estions que .v. o Maugis le larron,
Page:Castets - La Chanson des quatre fils Aymon, 1909.djvu/501
Le texte de cette page a été corrigé et est conforme au fac-similé.
473
les quatre fils aymon
