Si va li .i. en France, à Rains ou à Soisons,
Li autres en Galice, li tiers en Karion[1]
Et li quars en Gascoigne, droit vers les fils Aymon.
En chascuns des chemins que només vos avon,
Avoit .m. chevaliers, fermés les confanons,
Adobés de lor armes sor les chevaus gascons,
Qui jurée ont la mort Renaut, le fil Aymon,
Et ses freres tous trois qui molt sunt bon baron,
Dont Jhesus les desfende par sa beneïçon.
Atant es vos les contes brochant à esperon,
Sor les muls ambleors, as mentiaus vermeillons.[2]
Premiers les voit Ogiers, il et si compaignon.
François sunt desrengié à guise de faucon.
Quant Ogiers l’a veü, si dolans ne fu hom.
Il saut en Broiefort, en sa main .i. baston,
Ses chevaliers apele, ses a mis à raison.
« Merci, ce dist Ogiers, frans chevalier baron,
Ja estes vos mi home et mi bon compaignon
Et cist sunt mi cousin qui vont en la prison,
En destroit de la mort ; ja vif n’en estordront.[3]
Ne[s] verroie morir por nul avoir del mont.[4]
Chascun de vos donrai ou chastel ou donjon
Ou tant de mon avoir qu’il sera riches hom,
Si vos traies ariere le trait à un bojon. »
Et il li respondirent : « Vostre commant feron. »
Et cil s’en passent oltre qu’aperceü nes ont ;
Vindrent en la valée trestot el plus parfont ;
Quant n’i voient nului, forment esgaré sont.
Aallars en apele Guichart le fil Aymon :
« Molt te voi [or palir] le vis et le menton ;[5]
Frere, ke t’en est vis ? conte moi ta raison. »
« Je n’os, ce dist Guichars, por Renaut le baron. »
Page:Castets - La Chanson des quatre fils Aymon, 1909.djvu/503
Le texte de cette page a été corrigé et est conforme au fac-similé.
475
les quatre fils aymon
