Jamais por nul pooir ne nos asambleron ;
Mais tenons nos ensamble, tant come nos vivons. »
Guichart ont deslié et les piés et les poins,
Et si l’ont fait monter sor .i. ceval gascon,
Un bon escu au col et forte lance el poing.[1]
Or sunt li .iii. monté des .iiii. fix Aymon
Et li quars se combat à force et à vigor.
C’est Richars li menor, ki cuer ot de baron,[2]
Ki tos sols fu remes à la roce Mabon.
Desoz lui orent mort son mulet arragon[3]
Et lui el cors navré, molt estoit anguissos.
Ses plaies li destraignent, dont il a grant dolor.
Mais il lor a ocis .v. chevaliers barons
De la mainie Charle, le roi de Mo[n]loon.[4]
Il ne puet mais sofrir, tant estoit anguisos ;
Il fuit entor la roce por avoir garison.
Girars de Valcorant i vint à esporon,
Et se paine d’ataindre, il ait maleïçon.[5]
Et cil estoit cosins Fouque de Morellon ;[6]
Mort le trove gisant par deles .i. boisson.[7]
Il le p[l]aint et regrete : « Mar fustes, gentils on ;[8]
Se ne vos puis vengier, ne me pris .i. boton. »
Puis broce le ceval par grant aïrison
Et a brandie l’anste, destort le confanon,
Et vait ferir Richart el mantel vermellon.
L’escarlate li trance et l’ermin peliçon ;
La cemise de lin ne li fist garison.[9]
Parmi le cors li mist la lance et le penon.
Iluec l’a abatu devant lui el sablon.
- ↑ 7106 Metz : .i. li baillierent et l’anste et le penon.
- ↑ 7109 Metz : Li mainsnés
- ↑ 7111 Metz : Desos lui ont Franc mort.
- ↑ 7115 L Moloon. Après ce vers Metz place avec raison le v. 7113 : Ses plaies le destrainent dont il ert en dolor ; mais il omet les vers 7116, 7117.
- ↑ 7119 Metz : Moult se paine d’ochirre, il ait maleïchon.
- ↑ 7120 Metz : Focon del Morillon.
- ↑ 7121 Metz : buison.
- ↑ 7122 L paint. M Metz : plaint.
- ↑ 7128 Manque à Metz.
