Or nos conselt ci sire ki vint à passion. »
Segnor, or faites pais por Deu ki ne menti.
A l’estor vint poignant, si comme je vos di,[1]
Ogiers et cuens Guimars [cui][2] ja Jhesu n’aït,
Et escrient Renaut : « Vassaus, vos estes pris,
Vos deves à grant duel en la roce morir,
Qant vos crees Yon ki tant mal a apris,
Ki vos vendi à Charle, vo mortel anemi.
Certes plus l’amies que vo cosin Maugi ;
Or le vos a li fel mauvaisement meri.
Mais c’aves enpensé ? Mostres moi vostre avis.
Desfenderes vos plus, ou vos renderes[3] pris ? »
« Certes, ce dist Renaus, por noiant as ce dit.
Jamais ne me rendrai, tant com jo soie vis,[4]
Or nos en aït Dex, li pere Jhesu Cris. »
En l’estor est venus Ogiers li poigneor,
Il et li cuens Guimars [et Faus de Monjançon] ;[5]
Renaut ont escrié : « Car vos rendes prison.
Desfend[e]res vos plus ? contes nos vo raison,[6]
Par foi, traï vos a li rices rois Yon,
Ne vos poons valoir le pris d’un esperon. »
« De par Deu, dist Renaus, Dex nos face socors.
Ja ne nos enmenres, tant comme vif soion.
Miels vol ici morir ke me pende Charlon ;
Car je n’ai rien emblé, par la foi que doi vos. »
Dist Ogiers li Danois : « Car les asalons dont.
Ja n’i remandront mie, se no foi n’i menton.
Mais ja nes asaudrai, par la foi que doi vos,
Car je sui tos armés, si ai mil compaignons.
Ne ja n’aueres de moi aïde ne socors.[7]
- ↑ 7319 M issi com je vous di. Metz : Ogiers, si com jo di.
- ↑ 7320 L Ki. M à qui ; Metz : le v. manque.
- ↑ 7328 L Vos nos renderes. M vous vous rendrez. Metz : vos renderez.
- ↑ 7330 M. soit en aide le roi du paradis. Metz. le v. manque.
- ↑ 7333 L le traïtor felon. M et Faus de Monoisons. C’est Faus de Monjançon qui avec Guimars commande les Français ; plus loin ils somment Ogier de leur donner son aide. — Metz : de Mongenchon.
- ↑ 7335 L desfendres.
- ↑ 7346-7347. Texte de Metz :
Ne ja n’ares de nos aïde ne secors.
.iii. mil estes à armes as aubers fremillons
