Ne vos garra chastiaus, fermetés ne donjon
Ne gaite n’eschergaite ne nul riens del mont,
Que ne perdes la teste ains que past li tiers jors. »
Lors commence son charme Maugis li bons larrons.
Maintenant endormirent la gent trestot entor.
Hé Dex ! Renaus i ot à ami maint baron ;[1]
Ceus esveilla Maugis, de çà .iiii., çà dons ;
L’afaire lor conta et la grant traïson
Que rois Yus avoit fait de Renaut son baron.
[Il mainent grant dolor quant entendu l’a on.][2]
Et Maugis ne se targe, cui Dex doint grant honor ;
Bondin a pris, .i. cor, sel sona par vigor,
Et il courent as armes maintenant sens demor.[3]
Et [chastel] s’adoberent auquant et li plusor ;[4]
Quant oent de Renaut conter la traïson,
[Tel duel firent entr’els et si grant ploreson],[5]
A poi que il ne dervent, tant ont duel et iror[6]
- ↑ 7605 M Hé Dex ! il i avoit maint nobile baron Qui moult aiment Renaut le fix au viel Aymon Et Richart et Guichart et Aalart solonc. — Metz : E Dex ! Renaus i ot desi à mil barons Qui l’aiment moult forment et Aalart le blont.
Texte de Metz jusqu’au v. 7623 :
Cex esvella Maugis et cha .iii. et cha dols.
Del palais les geta coiement à larron ;
L’afaire lor conta et la grant mesproison
Que rois Yx avoit fait de Renaut lor segnor.
Comme cil l’entendirent, moult grant dolor en font.
Amaugis ne s’atarge, qui Dex envoit honor,
Bondin mist à sa bouche, sel sona par vigor.
A Montauban avoit tel costume à cel jor,
Quant ooient soner Bondin par tel error,
Qu’il coroient as armes maintenant sans demor.
El chastel s’adoberent auquant et li pluisor.
Quant oent de Renaut conter la traïson,
A poi que il ne desvent, si grant dolor en font.
Les freres regreterent et font grant marison.
Ahi ! tant mar i fustes. - ↑ 7609 Pris de M.
- ↑ 7612 M Et cil courent as armes qui entendent le ton. B. Et couroient as armes li chevalier baron.
- ↑ 7613 Pris de Metz. L palais.
- ↑ 7615 Pris de M. B Tel duel en font entre eus, ains si grant ne vit on.
- ↑ 7616 iror est lisible, malgré la note de Michelant.
