En milieu de vo terre prendrons [nos] vos avoirs ;[1]
Ja ne seres si fors ke vos nos requerois. »
« Or manecies soef, dist Renaus li cortois,[2]
Que nos avons castias, tes .iiii. ou tex .iii.,[3]
Où nos vos atendrons et Charle vostre roi,
Se il en est mestiers, plus de .xiiii. mois.
Ains que vos les aies, ara caut li plus frois.
En iceste contrée cort point vostre bofois.[4]
Comment que il en prene, vostres est li sordois.[5]
Fouque de Morellon poes porter le roi ;[6]
De moie part li dites que jo ço li envoi.[7]
N’ira mais en batalle ne en cembel des mois. »
Et respondi Ogiers : « Certes, ce poise moi. »
Atant s’en vait Ogiers, si remest la tençons,
Et vint à Monbendel où ert li tres Charlon.
Là descendi Ogiers devant son pavellon..
Molt se contint li bers et dolans et enbron.
Atant i est venus l’empereres Charlon,[8]
Oliviers de Viane et Rollans au cief blont,
Salemons de Bretaigne, Estols li fix Odon,
Ricars de Normendie, li Baiviers Ydelon.[9]
Et dist li uns à l’autre : « Caitis, quel le ferons,
Qant ancui verons pendre Renaut, [le] fil Aymon,[10]
Et Allart et Guichart et Richart le menor ?[11]
Cosin somes germain, pres nos apertenon.
Se nos les laissons pendre, jamais honor n’aron. »[12]
« Ogier, dist l’emperere, où sunt li fil Aymon ?
Aves les vos ocis, ou jes auerai prison ? »
- ↑ 8064 L prendrons vos avoirs. M nous nos arois.
- ↑ 8066 L mavecis. M menachiez.
- ↑ 8067 M castiaux… tex… tex.
- ↑ 8071 M dout poi.
- ↑ 8072 M Comment que le plet aille, vostre en est li sordois.
- ↑ 8073 M Moreillon.
- ↑ 8074 M itel li.
- ↑ 8081 M Atant es vous venir l’empereor.
- ↑ 8084 M Huidelon.
- ↑ 8086 M verron pendre Renaut le. L li fil.
- ↑ 8087 M Guichardin.
- ↑ 8089 M Joie n’aron.
