Isnellement et tost est saillis es arçons.
Rollans cria : « Monjoie ! C’est .i. des fius Aymon,
Il a à nom Richart, des autres le menor.[1]
Par ceste moie barbe qui me pent au menton,
Se icist vos eschape, je le dirai Charlon
Que je n’i oi de vos aïde ne secors. »
François sunt retorné, ki doutent le baron ;
A Richart ont lanciés .c. espiés bandon,
Damle Dex le gari, par sa redemption,
Que il ne l’ont ocis maintenant el sablon.[2]
.xiiii. l’en enbatent en l’escu à lion ;
Desous lui li ont mort son destrier arragon,
Qu’à terre li caï li foie et li pomon.
Richars se vit à terre, ainc tel duel n’en ot om,
Adonc le regreta à guisse de baron :
« Ahi ! tant mar i fustes, bons destriers arragon !
S’or ne vos puis vengier, ne me pris .i. bouton.
Chastel de Montauban, à Deu vos comendon.
Ahi ! Renaut, biaus frere, hui departirons nos.
Jamais ne me verres, ne je [ne] verrai vos. »[3]
Lors a traite l’espée ki li pent au giron,
Et vait ferir Antelme, [.i. conte molt felon],[4]
Durement l’a navré, mais ne morut adonc ;
Puis a gardé sor destre, vit Hunaut le baron[5]
Qui le voloit ferir d’une lance à bandon ;
Et Richars li trestorne, li fius au viel Aymon :
Tel cop li a doné, voiant tous les barons,
Qu’il l’a mort abatu devant lui el sablon.
Rollans trait Durendart donc à or est li pons,
Et escrie Richart hautement, à cler ton :
« Biaus amis, Richardet, et car te rens prison.
Ce sera grans damages, se nos ci t’ocion.
- ↑ 9338 Metz : molt est chevalerox.
- ↑ 9345 L M se vit.
- ↑ 9355 L ne je verrai.
- ↑ 9357 L le seignor d’Avignon. M Antiaume .i. conte moult felon. A Antoine le conte. M a raison, car le comte d’Avignon est mort dès Vaucouleurs.
- ↑ 9359 M Huart le baron. Il s’agit d’un des conseillers du roi Yon qui échappèrent à la colère de Renaud, Hunaus de Tailleborc.
