Page:Castets - La Chanson des quatre fils Aymon, 1909.djvu/588

La bibliothèque libre.
Le texte de cette page a été corrigé et est conforme au fac-similé.
560
les quatre fils aymon

Je te plevis ma foi orendroit à bandon,
Que tu n’i auras mal dont aidier te puison. »
9370« Sire, ce dist Richars, et donc me rendrai jou. »
Lors a rendu s’espée à Rollant le baron.
Rollans le fait monter sor .i. mul arragon ;
Liés et baus et joians s’en est tornés à tout.
Encui sera menés as puis de Monfaucon ;[1]
9375S’aura el col la hart o tot le caiaignon.
Se dame Dex n’en pense et Maugis li larron,
Encui sera livrés à grant destrucion.
Uns messagiers s’en torne, brochant à esperon,
Qui dira la novele Renaut, le fil Aimon.
9380Là où il voit Renaut, si l’a mis à raison :
« Noveles vos sai dire, gentius fius à baron,
Par le mien essiant, où nos perdu avom. »
« Comment ? ce dist Renaus, contes vostre raisom. »
« Par foi, ce dist li mes, ja ne le celeron.
9385Rollans enmaine pris Richardet le menor. »
« Est-ce voir ? » dist Renaus. « Oïl, par saint Simon ».
Quant Renaus l’entendi, si chiet en pamisson,
Et Aallars l’ainés et Guichars au chief blont,
Et tirent lor cheveus et destordent lor pons.
9390Hé Dex ! com ils desrompent lor hermins peliçons !
En haut parla Renaus, li fius au viel Aimon :
« Dame Dex, sire pere, par vo saintisme non,
Ki alastes par terre à guise de povre hom
Et garistes Jonas el ventre d’un poison ;
9395Sains Andrius et sains Pere ierent vo compaignon ;
Il estoient en mer por peschier au poison.
Hui main estions .iiii., tuit chevalier baron,
D’un pere et d’une mere, molt nos entramiom.
Or ne somes que .iii., ne nos pris .i. boton.
9400Ahi ! mors, car me prens ; jamais n’aurai honor. »

  1. 9374 Est-il nécessaire de noter que, pour le trouvère, Montfaucon est un terme générique, le lieu où la justice du roi s’exerce par la pendaison ? Les fourches, on l’a vu, n’y sont pas permanentes ; elles avaient été dressées à l’intention des Fils Aymon ; puis Roland comptait y faire monter Yon, le roi traitre. Renaud y pendra Ripeus et quinze des drus de Charlemagne.