Ce est molt grant fiance à moi et à tos rois ;
Quant çou m’aves requis, ne m’ames pas bien voir.
Ja ne pandrai Richart, si m’aïst Dex et Fois.[1]
Preudes toute vo terre, se vos le comendois.[2]
Dahax ait qui por honte weut son fief retenoir. »[3]
Charles en apela le baivier Yudelon.
« Baiviers, dist l’empereres, tu ies mes liges hom ;
De moi tenes Baiviere et Maience selonc ;[4]
Vos me deves servir à .x.m. compaignons.
Or me pandes Richart, le fil au viel Aymon,
Et je vos baillerai .x.m. compaignons.[5]
Ne me deves faillir, quant ce vient au besoing ;
Et je vos en donrai la cité d’Avalon.[6]
Si maintenes mon droit vers Maugis le larron. »
« Sire, dist li Baiviers, en moie foi je non.[7]
Cousin somes germain, pres nos apartenom.
Ja n’aura Richars mal dont garder le puisom. »
Quant l’entant l’empereres, à poi d’ire ne font.
« Va, glos, ce dist li rois, li cors Deu mal te dont.
Richart, je vos pandrai, par mon flori grenon. »
Charles en apela Ogier le poigneor.
« Danois, dist l’empereres, tu ies mes liges hom.
L’autrier me fu conté qu’es plains de Waucolors
Vers Renaut me fesistes molt grande traïson.
Or volrai esprover se çou fu voir ou nom,
Et se çou ne fu voir, bon gré vos en saurom.
Or vos covient à pandre Richart, le fil Aymon,[8]
- ↑ 9947 M par la foi que vous doi.
- ↑ 9948 M Ne terre ne tendroi pour faire tel besloi.
- ↑ 9949 M Va, glous, dist l’emperere, tu soies maleoit. Richart, je vous pendroi, ja ne m’escaperois.
- ↑ 9952 Sic L A B M. Vers omis par Michelant qui néanmoins donne en note la leçon de C : De moi tenes vos Baule et Maience selonc. Il ajoute avec raison que cela détermine le domaine de Widelon.
- ↑ 9955 B la chité de Soisson, au lieu de cette répétition. Mais cette variante ne convient pas dans le texte de L, parce que plus bas il est question de lui donner Avalon (Michelant).
- ↑ 9957 M la chité de Vallon.
- ↑ 9959 M par ma foi, non feron.
- ↑ 9971 M Il vos estuet or pendre.
