A tot .m. chevaliers que nos vos bailleron,
Qui garderont les forces por Maugis le larron.
Et je vos en donrai Pavie, oltre les mons,[1]
Versiaus et Yvorie et Plaisence selonc.
.iiii.m. chevaliers servir, vos en vendront ;
Jamais deçà les mons servise ne feront. »[2]
« Sire, ce dist Ogiers, cuite vos en clamon.
Cousin somes germain, pres nos apartenon,
Mais qui Richart pandra, de mort le desfiom ;
Je aiderai Renaut o .iii.m. compaignons ;
Jamais ne li faudrai por nul home del mont. »
« Hé glous ! dist l’emperere, li cors Deu mal te doint !
Richart, je vos pandrai, par mon flori grenon.
Ogier de Danemarche, widies mon paveillon.
Se mais vos puis baillier, par le cors saint Simon,
Je vos ferai ardoir et bruir en charbon.
Ja par home qui vive n’en aurois garison. »
Charles en apela l’archevesque Torpin.
« Et vos, sire archevesques, l’empereres a dit,
Vos me deves servir à .x.m. fervestis.
Quant or vient al besoing, ne me deves faillir.
Li premiers apostoles qui iert à Rome mis,
Par saint Denis de France, vos i seres asis,
Si m’ales Richart pandre, mon mortel anemi,
O tot .m. chevaliers armés et fervestis,
Qui garderont mon droit por le larron Maugis. »
« Sire, dist l’arcevesques, or aves vos trop dit
Quant j’ai messe chantée, jel fas por Deu servir ;
Adonc vest mon hauberc et mon helme bruni ;
Si vois en la bataille sor felons Sarrasins.
Certes molt en sui liés, quant j’en voi .i. morir ;
Mais ja hom crestïens n’estra par moi ocis,[3]
Ne nel comencerai à Richart mon cousin. »
- ↑ 9974 Ces noms sont pris de la région où se déroule en en effet une partie de la légende d’Ogier.
- ↑ 9977 M decha Mongi servise.
- ↑ 10003 Sic L. B Ja hommez crestiens n’estera par moi ochis. Michelant dit qu’il manque une syllabe dans L et corrige : Mais ja homes. Zwick a déjà noté cette erreur. M Ains nul hom crestien ne fu.
