Si fiert en une estache, toute la fait trambler ;
S’il l’eüst conseü, il l’eüst afolé.
Estons, li fius Œdon, s’en est issus del tref ;
Li plus de ceus de France sunt apreis lui torné.
« Names, dist Charlemaignes, où sunt mi per alé ?[1]
« Sire, dist li dus Names, merci, por amor Dé.
Ci sui de vos servir pres et abandonés.[2]
Vous aves tous vos princes et banis et només ;[3]
Desiiers de Pavie est en sa terre alés.[4]
De tous les .xii. pers n’i a que .ii. remés,
C’est Richars de Ruhem que vos ici vees,[5]
Et moi drois empereres, à cui vos or parles. »
[Qant Charles l’a oï, s’a Richart apelé :][6]
« Venes avant, Richart de Ruhem la cité.[7]
Vos iestes .i. de ceus où plus me sui fiés.
Onques de vo linage ne me vint fausetés.
Or vos covient, amis, que Richart me pandes. »
« Sire, ce dist li dus, volentiers et de grés ;
Car je sui vos hom liges, si nel vos os veher.
Mais par mon chief, dans rois, je nel vos quier celer,
Se maing Richart as forches, ovec moi en vendres ;
Et je irai o vos, des armes aprestés,
O tot mil chevaliers, se vos les me livres ;[8]
Et faites Richart pandre à cui que vos voles.[9]
Se Renaus vos requiert ne Aallars l’ains nés,
Por vos sera mes cors vers eus abandonnés,
Et ferrai le premier, se jel puis encontrer.
Richars est de ma jeste et de mon parenté ;
Je nel pandroie mie, por quanque vos aves. »
« Hé glos, dist Charlemaignes, tot te confonde Dex.
- ↑ 10171 B Namlez.
- ↑ 10173 A Vees me ci devent vous qui suis abandonnez.
- ↑ 10174 B banis et eskivés. A Vous avez tos vos hommez batus et malmenez. M perdus et adirés.
- ↑ 10175 A d’Espaingne. B son oirre.
- ↑ 10177 A li Normens.
- ↑ 10179 Sic A. Manque à L. B Comme Kalles l’oï, s’a Richart apelé.
- ↑ 10180 B. Rouen. A je vous ai mont amé.
- ↑ 10189 B se vous le commandes.
- ↑ 10190 B au quel que.
