« Si m’aït Dex, dist il, Ripeu de Ribemont,
Je vos calenc Richart, nos le raplegeron.
Malvais garant aures en vo seignor Charlon. »
Atant es vos Maugis brochant à esperon ;
Ja li tenoit la lance sor le maistre giron,
Quant Renaus li escrie : « Non faire, gentius hom
Por Deu, ne l’atouchier, gentius fius à baron.
Car ne volroie mie por l’onor de Soison
Que nus hom l’eüst mort, se jou meïsmes non.
Ains vengeron no frere que durement amon. »
Lors saisist son espié Renaus li fius Aymon,
Et fiert desus l’auberc Ripeu de Ribemon.
Le cuer li a tranchié, le fié et le poumon,
Il l’a mort abatu devant lui el sablon.
Puis a dit à ses homes : « [Prandes] ses compaignons.[1]
Mar en estordra .i. par le cors saint Simon. »
Renaus descent à terre de Baiart l’arragon ;
Venus est à l’eschiele, si monte contremont,
Et a saisi son frere qui est sus l’escaillon.
Entre ses bras aporte contreval le baron ;
Si li a desloiés et les piés et les pons.
Plus de .c. fois li baise la bouce et le menton.
« Frere, porres garir ? » dist Renaus li frans hom.
« Oïl, ce dist Richars, se armes aviom. »
« Par mon chief, dist Renaus, asses vos en querron. »
« Frere, ce dist Richars, entendes ma raison.
Je weil avoir les armes Ripeu de Ribemon,[2]
Son hauberc, son escu et son helme reont,
Et s’aurai sa baniere et son destrier gascon. »
« Par foi, bien aves dit : » dist Renaus au baron.
Lors si vont desarmer Ripeu de Ribemont.
- ↑ 10606 L prandres. B C pendes. On voit en effet au v. 10630 que quinze sont pendus, mais une fois morts, comme Ripeus, Michelant juge que la leçon de B C concorde mieux avec la suite et l’introduit dans le texte.
- ↑ 10618 Richard veut les armes de Ripeu pour annoncer lui-même, sous ce déguisement, à Charlemagne comment les choses ont tourné autrement que l’empereur ne l’avait prévu. De là nouveaux combats et la captivité de Maugis.
