Del fer et de l’acier i fait .ii. piés passer.
Charles cria Monjoie, qui molt fu esfraés :
« Amis Rollans, biaus niés, ou iestes vos alés ? »
Il a gardé sor destre, s’a .i. espié trové,
Et Maugis s’en torna, n’i ossa plus ester.
Hé las del franc baron ! trop est aseürés,
Car Renaus estoit ja à Balançon passés ;
Si enguie ses freres au branc d’acier letré.
Rollans et Oliviers sunt es chevaus monté ;
Molt sunt en l’ost dolant qu’il furent escrié.
Rollans dist à ses homes : « De bien faire panses. »
Or s’en tornent François et rengié et serré,
Et Maugis chevauçoit son destrier sejorné,
Et garde devant lui, s’a François encontré.
Li broce le cheval par an .ii. les costés,
Et a brandi la hante o l’espié neellé ;[1]
Fiert .i. home Olivier en son escu listé,
Sos la bocle li perce, l’auberc li a fausé ;
Parmi le gros del cuer li fait le fer passer ;
Toute plaine sa lance l’abat mort ens el pré ;
Puis vait ferir Franquet, cousins Olivier ert,
Le fil Milon de Puille, d’Otrante la cité,
Que l’escu de son col li a frait et troé.
Tant fu fors li haubers, n’en pot maille fauser.
Toute plaine sa lance l’abati au joster,
Lors crie Montauban à sa vois haut et cler :
« Ahi ! Renaut, biau sire, et où iestes alés ?
Por amor Dame Deu et car me secores.
Se je sui retenus, grant damage i aures. »
Mais Renaus li cortois s’en fu devant alés.
Atant es Olivier poignant tot abrivé,
Et vait ferir Maugis en son escu listé.
Desos la boucle à or li a frait et troé
Et l’auberc de son dos rompu et depané.[2]
Il l’empaint par vertu et de grant poesté ;
Toute plaine sa lance l’a del cheval porté.
Et Maugis li cortois s’en est en piés levés
Page:Castets - La Chanson des quatre fils Aymon, 1909.djvu/651
Le texte de cette page a été corrigé et est conforme au fac-similé.
623
les quatre fils aymon
