Page:Castets - La Chanson des quatre fils Aymon, 1909.djvu/659

631

les quatre fils aymon

Samblant faisoit Baiars qu’il veut estre enselés.
Il li a mis le frain et lacié le poitrel ;
Estroitement le cengle d’un toisu d’or ovré.
Baiars soloit Renaut et saillir et juer ;
11430Mais or ne l’osse il veoir ne esgarder,
Car bien voit li chevaus qu’il est molt aïrés.
Renaus vesti l’auberc, si a l’elme fermé,
Et a çainte l’espée au pont d’or noelé,
Et pandi à son col .i. fort escu bouclé,
11435Et tint entre ses poins .i. espié aceré,
As .iii. claus de fin or le confanon fermé ;
Puis monta en Baiart le bon destrier faé.
De Montauban s’en ist, le chastel seignoré,
Et trespasse les terres et les amples regnés,
11440Et Baiart a le frain trestot abandoné.
El bois de la Serpente s’en est Renaus entrés
Et vint à Balençon, si a passé le gué.
.xx. escuiers encontre qui vienent d’abevrer
Et choisissent Renaut, si l’ont araisoné :
11445« Qui estes vos, vasals, qui cest chemin erres ? »
Et Renaus lor respont : « Jel vo dirai asses.
Je sui des gens Ripeu, qui sui vis eschapés.
Del bos de Colençon [m’en sui je retornés ;]^[1]
Illuecques m’en foï por le mien cors salver,
11450Quant Ripeus fu pandus et as forches levés.
Dolans sui del baron, jamais ne serai clers.
Que fait Charles mes sires ? a il encor soupé ? »
Li escuier respondent : « Molt a grant joie as trés.
Li dex de vo seignor est auques obliés,^[2]
11455Car Charles a Maugis, le bon larron prové. »
« Est ce voir ? » dist Renaus. « Oïl, par charité ;
M 302Oliviers li rendi, li frans quens honorés. »
« Hé Dex ! ce dist Renaus, tu soies aorés ! »
Li escuier s’en tornent, si ont le fil passé,^[3]
11460Et Renaus li cortois se prist à dementer.

1. 11448 Sic C. L répète me suivis eschapés. Le vers manque à B
2. 11454 B Li deus.
3. 11459 C l’eve. B l’iaue. Au v. 11432 M si a le fil passé. V. infra, v. 11690. Fil au sens de fleuve, se trouve aussi dans B, à l’épisode de la chasse.