Dus Namles et ma dame, cil serront lés à lés,
Et vos et l’arcevesques ensamble mengeres.
Ogiers et Aallars, cil serront lés à lés,[1]
Et Guichars et Richars et Estous l’adurés ;
A chascun des Gascons iert ses més aportés.
Chascuns mangust issi con l’avons devisé ;
A la loi des François nos covient atorner. »
« Par foi, ce dist Renaus, ce aves bien parlé. »
Au mengier sunt asis ensamble lés à lés,
Et ont à molt grant joie pain et vin et claré
Et cisnes et paons et malars et lardés.
S’il furent bien servi, ne l’estuet demender.
Quant il orent mengié et beü à planté,
Il leverent des tables, si ont lor mains lavé.[2]
« Seignor, ce dist Ogiers, et que nos respondres ?
Rendres vos ces espées et cel aigle doré
Et la corone Charle dont il est molt irés ?
Li rois vos donra trives jusqu’à .i. an passé. »
« Sire, ce dist Maugis, ja mar en parleres.
Volentiers rendrons tout, por la vostre amisté,
Et por l’amor duc Naime et Torpin l’ordené,
Et Estout le cortois que je voi ci ester. »
Donques lor aporterent les bons brans acerés
Et la corone d’or qui molt fait à loer,
Et l’aigle tot ausi, dont dist Ogiers li ber :
« Ci a molt bel gaaing, qui le poïst garder. »
« Por saint Pol, dist Richars, ains est au cols doner,
Que ja li miens gaains soit si abandonés. »
« Frere, ce dist Renaus, se vos plaist, non feres. »
« Par foi, ce dist Richars, ja mar en parleres. »
« Seignor, ce dist dus Namles, prenes cestui à gré.
Encor nos fait Renaus, seue merci, bonté
Que il nos a rendus nos bons brans acerés. »
- ↑ 11903 B per à per. Ainsi est évitée, comme le note Michelant, la répétition de lés à lés que l’on a aux vers 11901 et 11909, mais ces répétitions elles-mêmes sont souvent du goût archaïque.
- ↑ 11914 P il osterent les tables, li lavers est criez.
riques autant au moins que ceux dont s’occupe Maugis. L’élément nouveau est la courtoisie que l’on met à bien placer les gens à table.
