« Par mon chief, dist Ogiers, vos ne l’atocheres,
Laissies ester Renaut, gardes ne l’adeses.]
Nos avons ci Renaut conduit et amené
Entre moi et [Namon] et Torpin m’ordené.[1]
Gardes que il n’i soit touchiés ne adesés. »[2]
« Par foi, ce dist Rollans, mal le garantires »[3]
« Sire, ce dist Ogiers, ja mar en parleres,[4]
Que par la foi que doi Charle, nostre avoé,[5]
Je ferai ja mes homes et rangier et serrer.
Qui asaura Renaut, je li voldra[i] aidier. »[6]
« Rollant, dist Oliviers, Renaut laisies ester.
Ja me fist .i. servise dont je li sai bon gré.
Por la moie amistié cist respit li dones. »
« Receves ent l’espée, ce dist Rollans li ber ;
Si s’en viengne prisons, nos n’en poons faire el. »
« Seignor, dist li dus Names, nos le menrons as trés.
S’orrons de Charlemaigne que il a enpensé.
Se traïson nos fait, molt nos porra peser ;[7]
Nos l’en monstrerons voir .xxx.m. adoubés. »
« Voire, ce dist Rollans, del menacier penses.
Vos poes tel plait faire, jamais n’iert acordés. »
Ramprosnant vont li conte entresi que as trés.
« Sire, ce dist Ogiers et Torpins l’ordonés,
A Montauban alames vo mesage porter.
Renaut vos amenons et Aallart l’ainsné ;
Il rendent les espées volentiers et de gré.
Ves ci vostre corone, se prendre le voles ;
Si aures l’aigle d’or, quant vos commenderes.
Ne nos faites pas honte n’à vo riche barné. »
« Ogier, ce dist li rois, por noiant en parles,
Ne Names ne Estous ne Torpins l’ordené,[8]
- ↑ 12068 L donne Ogier parce qu’en raison de la lacune, ces mots semblent dits par Naymes.
- ↑ 12069 Cf. texte de B à cet endroit.
- ↑ 12070 Metz, M A mal garans li seres.
- ↑ 12071 Metz : or vos amesures.
- ↑ 12072 Metz : au vis cler. Metz ajoute : Se main metes à lui, de mon cors vos gardes.
- ↑ 12074 L voldra. P voldrai. Metz volrai. Metz ajoute : Et ferai tous mes homes rengier et ordener.
- ↑ 12082 Metz : Se traïtors.
- ↑ 12095-12098 M : Rien n’en feroi por homme qui soit de mere nez,
