En la porte feri de l’espié noielé :
« Où iestes vos, Renaut ? venes à moi, parler.
Aves en vos Rollant par traïson mené ?
Par mon chief, por noiant s’est laiens enserrés ;
Ja tant come je vive, ne seres acordés. »
Il apele Olivier et Ydelon le ber,
Richart de Normendie, ses a araisoné :
« Seignor, vos iestes plege, n’iestes pas acuité,
Car Renaus a vers moi par traïson ovré.
Rollans s’est laisiés prendre, jel sai de verité. »
« Sire, ce dist Richars, bien poes amender.
Volentiers en ferons l’esgart des .xii. pers. »
« N’en covient pas, dist Charles, grant jugement mener.
Cui prent à meschaïr, fort est à relever.[1]
Oliviers de Viane, Ydelon, ça venes ;
Gondebuef de Vendueil, ne vos aseüres.
Si me faites molt tost toute m’ost destraver,
Et lor faites chargier et paveillons et trés.
Viengnent à Montauban, tele est ma volenté.
De plus pres lor volrai la guerre demener.
Chascun jor lor ferai novel asaut livrer. »
« Sire, dist Ydelons, s’il vos plaist, or oes.
Alons nos ent arrieres as loges et as trés,
Et vos vendres o nos, qui miex les destraindres.
Plus feront il por vos que por nos, ce saves. »
« Sire, ce dist Richars, il vos dist verité.
Venes ent ovec nos, si serons plus douté. »
« Par foi, dist l’empereres, je le ferai irés.
Ne porroie dire home com je sui abosmés.[2]
Qui me portera mais ne foi ne loialté,
Quant Rollans, li miens niés, m’a ore ci fausé ? »
A iceste parole sunt arriere torné
Et trespassent les terres et les amples reignés.
Desi à Monbandel ne se sunt aresté.
Charles vint à sa tante dont il estoit tornés,
Page:Castets - La Chanson des quatre fils Aymon, 1909.djvu/690
Le texte de cette page a été corrigé et est conforme au fac-similé.
662
les quatre fils aymon
